Aprelin 15-də ABŞ Senatı prezidentin Konqresin təsdiqi olmadan hərbi əməliyyat aparmasını məhdudlaşdıran qətnaməni rədd edib.
“Operativ Məlumat Mərkəzi-OMM” xəbər verir ki, bu barədə "Reuters" agentliyi məlumat yayıb.
Səsvermənin nəticələrinə əsasən, 47 senator qətnamənin lehinə, 52 qanunverici isə əleyhinə səs verib. Məlumata görə, senatorların mövqeyi əsasən partiya xətti üzrə bölünüb.
Bildirilib ki, qətnaməni dəstəkləyən yeganə respublikaçı senator Rend Pol, əleyhinə səs verən yeganə demokrat isə Con Fetterman olub.
Qeyd edilib ki, ABŞ və İsrailin 28 fevralda İrana qarşı hərbi əməliyyatlara başlamasından sonra Demokrat senatorlar bu təşəbbüsü artıq dördüncü dəfə təqdim ediblər.
ABŞ Konstitusiyasına əsasən müharibə elan etmək səlahiyyətinin Konqresə aid olmasına baxmayaraq, hər iki partiyanın nümayəndələri bu məhdudiyyətin qısamüddətli hərbi əməliyyatlara və ya ölkənin birbaşa təhlükə altında olduğu hallara şamil edilmədiyini bildirirlər.
