Türkiyə prezidenti Rəcəb Tayyib Ərdoğan ABŞ prezidenti Donald Trampla sentyabrın 25-nə planlaşdırılan görüşündə Yaxın Şərqin əsas müzakirə mövzusu olacağını bildirib.
"Operativ Məlumat Mərkəzi-OMM" Türkiyə KİV-ə istinadən xəbər verir ki, xüsusilə Suriya məsələsi ön planda olacaq.
“Yaxın Şərqdə atılan hər addım bizim üçün həyati əhəmiyyət kəsb edir. Bunu cənab Trampla müzakirə etməliyik. Bu, çox vacibdir”, - deyə vurğulayıb.
Türkiyə lideri həmçinin BMT Baş Assambleyası çərçivəsində Suriyanın müvəqqəti prezidenti Əhməd əl-Şara ilə də görüşəcək. Danışıqların Nyu-Yorkdakı Türk Evində keçirilməsi gözlənilir.
Ərdoğan-Tramp görüşündə gündəmin digər başlıqları arasında Fələstin, İsrailin bölgədəki fəaliyyəti, həmçinin ikitərəfli müdafiə əməkdaşlığı və silah alışları yer alacaq.
