"Amazon"un baş icraçı direktoru (CEO) Endi Cessi şirkətin 14 min işçini ixtisar etmə qərarının maliyyə səbəblərinə əsaslanmadığını, “şirkət mədəniyyəti” ilə bağlı olduğunu bildirib.
"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.
“Bu qərar, əslində, maliyyə səbəblərinə görə qəbul edilməyib, hətta hazırda süni intellektlə də birbaşa əlaqəli deyil. Bu, bir mədəniyyət məsələsidir”, - o qeyd edib.
Şirkətin rüblük satışlarının ötən illə müqayisədə 13 faiz artaraq 180 milyard dollara yüksəldiyi açıqlanıb.
Cessi son illərdə artan işçi sayı, yeni məkanlar və müxtəlif fəaliyyət sahələrinin şirkətdə iyerarxik təbəqələr yaratdığını vurğulayaraq deyib: “Fərqinə varmadan, işi görən insanların məsuliyyət və sahiblik hissəsini zəiflədə bilirsiniz”.
"Amazon"un işçi sayı 2021-ci ildə 1,6 milyonu keçmiş, ötən ilin sonunda isə təxminən 1,5 milyona enmişdi.
