Əgər Avropa ölkələri dondurulmuş Rusiya aktivlərini müsadirə edərsə, bu, onların Rusiya iqtisadiyyatına qoyduğu ən azı 266 milyard dollar həcmində investisiyanın itirilməsinə səbəb ola bilər.
"Operativ Məlumat Mərkəzi-OMM" xəbər verir ki,bu barədə Rusiya Dövlət İnformasiya Agentliyi RİA Novosti milli statistika xidmətlərinin məlumatlarına əsaslanaraq məlumat yayıb.
Hazırda Avropa İttifaqı Rusiyaya məxsus dondurulmuş aktivlər hesabına Ukraynaya kredit verilməsi imkanını müzakirə edir. Lakin bu məsələ ilə bağlı vahid mövqe yoxdur. Belçika və Fransa kimi bəzi ölkələr təşəbbüsün maliyyə sisteminə mümkün mənfi təsirlərindən ehtiyat edərək, bu addıma qarşı çıxırlar.
RİA Novosti-nin məlumatına görə, Rusiyanın təxminən 236 milyard dollar dəyərindəki aktivləri Avropa yurisdiksiyalarında dondurulub. Bu məbləğin böyük hissəsi — 228 milyard dolları — Belçikada yerləşən Euroclear depozitarında saxlanılır. İsveçrə isə Rusiyaya məxsus 8,4 milyard dollarlıq aktivləri dondurub.
