Rumıniya və Bolqarıstanda NATO-nun çoxmillətli “Dacian Fall 2025” adlı genişmiqyaslı hərbi təlimi başlayıb.
"Operativ Məlumat Mərkəzi-OMM" xəbər verir ki, bu barədə Rumıniya Radiosu məlumat yayıb.
Təlimlərdə 10 üzv ölkədən - Belçika, Bolqarıstan, İspaniya, İtaliya, Lüksemburq, Polşa, Portuqaliya, Rumıniya, Şimali Makedoniya və Fransadan 5000-dən çox hərbçi və 1200 ədəd hərbi texnika iştirak edir.
Manevrlər oktyabrın 23-dən noyabrın 1-dək davam edəcək və Rumıniya ilə Bolqarıstandakı NATO döyüş qruplarının briqada səviyyəsinə qədər genişləndirilməsi prosesində son mərhələ sayılır.
Cənub-Şərq Çoxmillətli Diviziya Komandanlığının planlaşdırdığı təlimlərin əsas məqsədi, şərq cinahda NATO qüvvələrinin inteqrasiyasını və birgə əməliyyat imkanlarını gücləndirməkdir.
Rumıniya Müdafiə Nazirliyinin məlumatına görə, Cənub-Şərq Diviziyası 2015-ci ildə yaradılıb və onun missiyası Rumıniya və Bolqarıstan ərazilərində kollektiv müdafiə əməliyyatlarını əlaqələndirməkdir.
Xatırladaq ki, Rumıniyada yerləşən NATO-nun İrəli Quru Qoşunlarının Döyüş Qrupu (FLBG) 2022-ci ildə Ukraynadakı münaqişə fonunda qurulub və hazırda Fransa, Belçika, Lüksemburq və İspaniyadan təxminən 1700 əsgər burada xidmət edir.
