İsrail ordusunun 2023-cü ilin oktyabr ayından bəri Qəzzaya endirdiyi zərbələr nəticəsində həlak olanların sayı 72 min 941 nəfərə yüksəlib.
"Operativ Məlumat Mərkəzi-OMM" xəbər verir ki, Qəzza Səhiyyə Nazirliyinin yaydığı məlumata görə, atəşkəs rejiminə baxmayaraq İsrailin bölgəyə hücumları davam edir.
Bildirilib ki, son 24 saat ərzində xəstəxanalara 2 nəfərin nəşi və 40 yaralı çatdırılıb.
Məlumata əsasən, 10 oktyabr 2025-ci ildə qüvvəyə minmiş atəşkəsdən sonra İsrail hücumları nəticəsində 932 nəfər həlak olub, 2 min 859 nəfər xəsarət alıb.
Dağıntılar altından isə 781 nəfərin nəşi çıxarılıb.
Nazirlik qeyd edib ki, 2023-cü ilin oktyabrından indiyədək Qəzzaya qarşı həyata keçirilən hücumlarda yaralananların ümumi sayı 172 min 967 nəfərə çatıb.
Qeyd olunur ki, Qəzzada dağıntılar altında hələ də minlərlə insanın nəşi qalmaqdadır.
