ABŞ-də Los Ancelesə gedən sərnişin təyyarəsi havaya qalxdıqdan qısa müddət sonra pilotlarla bələdçilər (kabin heyəti) arasında əlaqənin kəsilməsi səbəbilə təcili eniş edib.
"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.
Federal Aviasiya Administrasiyasının (FAA) verdiyi açıqlamada, Los Anceles istiqamətində hərəkət edən sərnişin təyyarəsinin yerli saatla 19:45-də Nebraska ştatındakı Eppley Hava Limanına təcili eniş etdiyi bildirilib.
"SkyWest" aviaşirkətinə məxsus təyyarənin pilotunun, kabin heyəti ilə əlaqə qura bilmədiyi üçün təcili eniş etdiyi qeyd olunub.
Açıqlamada həmçinin vurğulanıb: “Enişdən sonra təyyarədaxili rabitə sistemində problem olduğu müəyyən edilib. Bu zaman kabin bələdçiləri kokpitin qapısını döyürdülər.”
"American Airlines" şirkətinin uçuşunu həyata keçirən "SkyWest"dən verilən açıqlamada isə təcili enişdən sonra təyyarənin Los Ancelesə gecikmə ilə uçduğu bildirilib.
"American Airlines" sözçüsünün verdiyi məlumata görə, rabitə sistemi yanlışlıqla açıq qalıb və pilotlar qulaqcıqdan gələn səslərə əsaslanaraq kokpitə kimsə girməyə çalışır deyə düşünüblər.
