Hakim Givi Hovhannisyanın sədrliyi ilə keçirilən Korrupsiyaya Qarşı Mübarizə Məhkəməsi Ermənistanın üçüncü prezidenti Serj Sarkisyana qarşı həbs qətimkan tədbirinin dəyişdirilməsi ilə bağlı prokurorluğun vəsatətini rədd edib.
"Operativ Məlumat Mərkəzi-OMM" xəbər verir ki, əvvəllər bildirilib ki, sabiq prezidentin həbs-qətimkan tədbirinin dəyişdirilməsi ilə bağlı prokurorun vəsatətini müzakirə etmək üçün Sarkisyanın işi üzrə bu gün fövqəladə məhkəmə iclası təyin edilib. İddia olunurdu ki, prokuror Serj Sarkisyanın Ermənistanı tərk etmək niyyətində olduğunu göstərən “əməliyyat” məlumatı əldə edib.
Üstəlik, bir ay əvvəl məhkəmə Sarkisyana qarşı tətbiq edilmiş həbs-qətimkan tədbirini – ölkəni tərk etməmək barədə yazılı öhdəlik götürməklə – 30 milyon dram (təxminən 79 min dollar) məbləğində girov tələbini saxlayaraq ləğv edib.
Məhkəmə bugünkü iclasın nəticəsində prokurorun onun barəsində ölkədən çıxışına qadağa qoyulması ilə bağlı vəsatətini təmin etməyib, zaminə buraxılma tələbini bir daha qüvvədə saxlayıb. Sabiq prezidentin özü isə prokurorluğun onun ölkəni tərk etmək niyyətində olması ilə bağlı yaydığı məlumatdan çaşdığını bildirib.
Keçmiş prezident jurnalistlərə açıqlamasında "mən qaça bilən birinə oxşayıram?! Burda şərh verməyə belə heç nə yoxdur... Məhkəmənin mənə ölüm hökmü çıxarmaq niyyətində olduğunu bilsəm belə, bu ölkəni tərk etməyəcəyəm. Bu, mənim ölkəmdir" deyib.
