Afət Ziyadqızı
Moskva, Amerika rəsmilərinin Rusiya ərazisinin dərinliklərinə zərbələr endirilməsi ehtimalı ilə bağlı bəyanatlarını qeydə alıb.
"Operativ Məlumat Mərkəzi-OMM" xəbər verir ki, bu barədə Rusiya Prezidentinin mətbuat katibi Dmitri Peskov jurnalist Pavel Zarubinə verdiyi müsahibədə danışıb.
“Bu, əlbəttə ki, kifayət qədər təhlükəli simptomdur və Moskvaya təsirsiz ötüşmür. Biz bu bəyanatları müşahidə etmişik və əgər belə bir hal baş verərsə, bu, Rusiya tərəfindən adekvat cavab tələb edən, gərginliyin yeni və ciddi alovlanması olacaq,” – deyə Peskov bildirib.
Eyni zamanda Kremlin sözçüsü qeyd edib ki, Ukraynanın döyüş meydanında üstünlüyü ələ keçirməsinə imkan verəcək “sehrli həb” və ya “sehrli silah” hələ də yoxdur. Onun sözlərinə görə, hazırda heç bir silah növü cəbhədə vəziyyəti əsaslı şəkildə dəyişdirməyə qadir deyil.
