Afət Ziyadqızı
Ermənistan Qəzza zolağına humanitar yardım göndərməyi planlaşdırır.
"Operativ Məlumat Mərkəzi-OMM" xəbər verir ki, bu barədə Baş nazir Nikol Paşinyan Qahirədə Misir prezidenti ilə görüşlərdən sonra keçirilən birgə brifinqdə bildirib.
Paşinyanın sözlərinə görə, Ermənistan Qəzzada on minlərlə günahsız insanın həlak olmasından kədərlənir. Ermənistan mülki infrastruktura və mülki əhaliyə edilən hücumların nəticələrini şəxsən çəkib və indi Qəzzada dərhal atəşkəs üçün beynəlxalq çağırışlara qoşulur.
Paşinyan, "Qəzzaya humanitar yardımın çatdırılması ilə bağlı misirli həmkarlarımızla da görüşdük və onların köməyinə və məsləhətlərinə ehtiyacımız var. Prezident Əl Sisiyə bu məsələdə kömək etmək istəyinə görə təşəkkür edirəm", - deyib.
O bildirib ki, çatdırılmanın təşkili məsələsi iki ölkənin xarici işlər nazirləri tərəfindən müzakirə olunacaq.
Paşinyan xatırladıb ki, Fələstin-İsrail münaqişəsinə gəlincə, Ermənistanın mövqeyi dəyişməz olaraq qalır və “iki dövlət” prinsipini dəstəkləyir.
