Afət Ziyadqızı
İranda baş verən kütləvi etirazlar nəticəsində azı 544 nəfərin həlak olduğu bildirilir.
“Operativ Məlumat Mərkəzi – OMM” xəbər verir ki, “Associated Press” agentliyinin fəallara istinadən yaydığı məlumata görə, ölkənin müxtəlif bölgələrində davam edən etiraz aksiyalarının yatırılması zamanı ölənlərin sayı 544 nəfərə çatıb. Qeyd olunur ki, Tehrandakı rəsmi qurumlar bu məlumatlara hələlik münasibət bildirməyiblər.
Məlumata görə, İranın xarici işlər naziri Abbas Əraqçi Tehranda xarici diplomatlarla görüşü zamanı “vəziyyətin tamamilə nəzarət altında olduğunu” bildirib. O, nümayişlərin arxasında ABŞ və İsrailin dayandığını iddia etsə də, bu fikirləri təsdiqləyən hər hansı dəlil təqdim etməyib.
ABŞ Prezidenti Donald Tramp isə İran rəhbərliyinin etirazları sərt şəkildə yatırmaqla “qırmızı xətti keçdiyini” bəyan edib. CNN-in məlumatına görə, ABŞ administrasiyası İrana qarşı mümkün hərbi variantları nəzərdən keçirir.
