Gürcüstan Xarici İşlər Nazirliyi Finlandiyanın xarici işlər naziri və ATƏT-in fəaliyyətdə olan sədri Elina Valtonenin Tbilisidə keçirilən mitinqə səfəri ilə bağlı ATƏT Katibliyinə və təşkilata üzv dövlətlərə etiraz notası təqdim edib.
"Operativ Məlumat Mərkəzi-OMM" xəbər verir ki, bu barədə məlumat Gürcüstan Xarici İşlər Nazirliyinin bəyanatında yer alıb.
Bəyanatda deyilir: “Gürcüstan Xarici İşlər Nazirliyi Finlandiyanın xarici işlər naziri və ATƏT-in fəaliyyətdə olan sədri Elina Valtonenin səfəri ilə bağlı narahatlığını ifadə edir və ATƏT Katibliyinə, eləcə də iştirakçı dövlətlərə etiraz notası təqdim edib. ATƏT Katibliyinə göndərilən notada qeyd olunur ki, Valtonen Gürcüstana rəsmi səfərlə yanaşı, kiçik anti-hökumət qrupuna da qoşulub və Gürcüstandakı vəziyyətlə bağlı beynəlxalq ictimaiyyəti çaşdırmaq məqsədi daşıyan bəyanatla çıxış edib”.
Gürcüstan XİN bəyan edib ki, ATƏT sədri kimi Valtonenin belə addımı təşkilatın neytrallıq prinsiplərinə ziddir və ölkənin daxili işlərinə müdaxilə kimi qiymətləndirilir.
