Bosniya və Herseqovina ilə Avropa İttifaqına üzvlük haqqında danışıqlara start verilib.
"Operativ Məlumat Mərkəzi-OMM"-in xəbərinə görə, Avropa liderləri bu barədə planı təsdiləyiblər.
Balkan ölkəsi ittifaqa qoşulmaq üçün 8 il əvvəl Brüsselə müraciət edib.
Avropa Şurasının prezidenti Şarl Mişel “Avropa ailəmizdə sizin də yeriniz var” sözləri ilə Bosniya və Herseqovina rəhbərliyinə təbriklərini çatdırıb.
“Bugünkü qərarla siz Avropa İttifaqı yolunda əsas addımı atmış oldunuz. İrəliləmək üçün ciddi-cəhdlə göstərilən fəaliyyət davam etdirilməlidir”, - deyə Mişel qeyd edib.
Siyasi ekspertlər bildirirlər ki, Bosniya və Herseqovinanın rəsmi şəkildə bloka qoşulması hələ uzun müddət çəkə bilər.
Belə ki, bu ölkə rəhbərliyi bir sıra iqtisadi demokratik islahatlar aparmalıdır.
Avropa İttifaqı Rusiya-Ukrayna müharibəsi başladıqdan sonra Qərbi Balkan ölkələrini özünə birləşdirmək üçün xüsusi cəhd göstərir.
Avropa İttifaqı qoşulmaq üçün, eyni zamanda, Ukrayna özü, Albaniya, Gürcüstan, Kosovo, Moldova, Monteneqro, Şimali Makedoniya, Serbiya və Türkiyə də müraciət edib.
