Rusiya Xarici İşlər Nazirliyinin sözçüsü Mariya Zaxarova bildirib ki, Qərb ölkələrinin BMT Təhlükəsizlik Şurasında İranla bağlı atdığı addımlar hüquqi əsasdan məhrumdur və digər dövlətlərə heç bir öhdəlik tətbiq edə bilməz.
"Operativ Məlumat Mərkəzi-OMM" xəbər verir ki, onun fikirləri Nazirliyin keçirdiyi brifinqdə səsləndirilib.
Zaxarovanın sözlərinə görə, BMT Katibliyi İranla bağlı qətnamənin bərpası ilə əlaqədar öz saytında elan dərc etməyə tələskənlik göstərib. O vurğulayıb ki, Təhlükəsizlik Şurası Katibliyə bu kimi məsələlərdə – yəni Şuranın müstəsna səlahiyyətlərinə aid qərarlar qəbul etmək və ya nəticə çıxarmaq – hüquqi səlahiyyət verməyib.
Diplomat Böyük Britaniya, Almaniya və Fransanın sanksiyaların bərpası mexanizmlərindən istifadə etməyə çalışdıqlarını, lakin bunun üçün onların hüquqi əsasa malik olmadığını deyib. Zaxarova bildirib ki, bu ölkələr Birgə Kompleks Fəaliyyət Planı (JCPOA) çərçivəsində öhdəliklərini yerinə yetirməkdən imtina etməklə qətnamələri ardıcıl şəkildə pozublar.
“Buna görə də onların müzakirələrinin nəticələri hüquqi cəhətdən etibarsızdır və digər dövlətlərə heç bir öhdəlik yükləyə bilməz”, – deyə Zaxarova əlavə edib.
