Afət Ziyadqızı
Birləşmiş Millətlər Təşkilatının (BMT) Baş Assambleyası 15 Mart Beynəlxalq İslamofobiya ilə Mübarizə Günündə İslam düşmənçiliyi ilə mübarizə üçün atılacaq addımlar haqqında qətnamə layihəsini qəbul edib.
"Operativ Məlumat Mərkəzi-OMM" xəbər verir ki, BMT-nin Baş Assambleyasının zalında keçirilən səsvermədə 44-ü bitərəf olmaqla 115 səs verilib.
"Qərarsız səs"dən istifadə edən 44 ölkə arasında Fransa, İngiltərə, Almaniya, İtaliya, Yunanıstan, İsveç, İsveçrə, Finlandiya, Ukrayna və Hindistanın yer alması diqqət çəkib.
Qətnamə layihəsini hazırlayan və qətnaməni birgə təqdim edən qrupda yer alan Türkiyə səsvermə zamanı bəyan edib ki, İslamofobiya ilə mübarizəyə dair qətnamə layihəsinin müzakirəsi zamanı lazımi çeviklik nümayiş etdirilib.
Türkiyə nümayəndə heyəti səsvermədən əvvəl Baş Assambleyada ümumi mətn olan layihənin dəstəklənməsinə çağırıb və qanun layihəsinə gətirilən düzəliş təkliflərinin əleyhinə səs verib.
Qəbul edilən qərarda bütün növ KİV-lərdə ayrı-seçkiliyə, zorakılığa və dini nifrətə, habelə müsəlmanlara, o cümlədən müqəddəs kitablara və məkanlara qarşı dini dözümsüzlük, stereotip və düşmənçiliyi təşviq edən nəşrlər və yazılar pislənilib.
