ABŞ-nin keçmiş prezidenti Co Baydenə may ayında metastatik prostat xərçəngi diaqnozu qoyulduqdan sonra aldığı kimya terapiya müalicəsini tamamladığı bildirilib.
"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.
Baydenin ofisindən verilən açıqlamada, müalicə prosesinin bir neçə həftə davam etdiyi qeyd olunub.
Baydenin sözçüsü "NBC News"a verdiyi açıqlamada, 82 yaşlı sabiq prezidentin “şüa (radiasiya) və hormon terapiyası” aldığını və bu prosesin təxminən beş həftə davam etdiyini bildirib. Baydenin əlavə müalicəyə ehtiyac duyub-duymayacağı isə hələlik bəlli deyil.
Bayden keçən ay da, dəridəki bədxassəli toxumaların qat-qat çıxarılaraq təmizləndiyi “Mohs cərrahiyyəsi” üsulu ilə dəri xərçəngi müalicəsi almışdı və həmin dövrdə Bayden ictimaiyyət qarşısına alnında sarğı ilə çıxmışdı.
