"Yaxın günlərdə Sumqayıt şəhəri və Abşeron rayonunda üstünlük verilən məktəblərin siyahısı elan ediləcək".
"Operativ Məlumat Mərkəzi-OMM" xəbər verir ki, bunu Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov jurnalistlərə açıqlamasında deyib.
"Sıxlıq olan ərazilərdəki məktəblərə ora yaxın ərazilərdə yaşayan uşaqların qəbulundan sonra yer qalarsa digər uşaqlar üçün də qəbul elan ediləcək. Valideynlər indidən məktəb seçiminə başlasınlar", - deyə o əlavə edib.
Agentlik sədri, həmçinin bildirib ki, on beş gün ərzində şagirdlərin yerdəyişməsi ilə bağlı proqram təminatı aktivləşdiriləcək.
E. Bağırov açıqlamasında 20 min uşağın icma əsaslı məktəbəqədər təhsil layihəsinə cəlb edildiyini vurğulayıb. O bildirib ki, ucqar regionlarda alternativ modellərin tətbiqi davam edir: "Bir neçə regionda artıq tərbiyəçi-müəllimlər evlərində məktəbəqədər yaşlı uşaqları məşğələlərə cəlb edib. Bu işlər uğurlar həyata keçirilən ailə tipli məktəbəqədər təlim qrupları çərçivəsində həyata keçirilir".
