"Rusiya - ABŞ arasında görüş iki ölkənin diplomatik fəaliyyətlərini çətinləşdirən maneələri aradan qaldırmaq üçün keçiriləcək"
"Operativ Məlumat Mərkəzi-OMM" xəbər verir ki, bu sözləri Rusiya XİN-in rəsmi sözçüsü Mariya Zaxarova deyib.
Zaxarova paytaxt Moskvada keçirdiyi həftəlik mətbuat konfransında ABŞ ilə münasibətlərə toxunub.
Rusiya və ABŞ nümayəndə heyətlərinin yenidən bir araya gəlməsi məsələsinin gündəmdə olduğunu bildirən Zaxarova qeyd edib: "ABŞ ilə məsləhətləşmələrin ikinci mərhələsi sabah keçiriləcək. Danışıqların yeri, formatı və iştirakçıları dəyişməyib. Məsləhətləşmələr İstanbulda keçiriləcək".
Rusiya nümayəndə heyətinə Rusiyanın Vaşinqtondakı səfiri Aleksandr Darçiyev, ABŞ nümayəndə heyətinə isə ABŞ dövlət katibinin Rusiya və Mərkəzi Avropa üzrə köməkçisinin müavini Sonata Koulter başçılıq edəcəyini qeyd edən Zaxarova görüşdə iki ölkənin xarici işlər nazirliklərinin nümayəndələrinin də iştirak edəcəyini bildirib.
