Yaponiyanın paytaxtı Tokio şəhərində yerləşən ibtidai məktəblərin birində ciddi yanğın hadisəsi qeydə alınıb.
"Operativ Məlumat Mərkəzi-OMM" xarici KİV-ə istinadən xəbər verir ki, cümə günü səhər saatlarında “Takinogawa No. 3 Elementary School”un dördüncü mərtəbəsindəki musiqi otağında başlayan alov qısa müddətdə yuxarı mərtəbələrə yayılıb və binanı qatı tüstü bürüyüb.
Hadisə yerinə dərhal çoxsaylı yanğınsöndürmə briqadaları cəlb olunub.
Hadisə zamanı məktəbdə olan 300-ə yaxın şagird və işçi heyəti təhlükəsiz şəkildə binadan çıxarılıb.
Yanğın nəticəsində 10 nəfər yüngül xəsarət alıb. Zərərçəkənlərin əksəriyyətinin tüstüdən zəhərləndiyi bildirilir.
Hadisə yerindən yayılan görüntülərdə yanğınsöndürənlərin üçüncü və dördüncü mərtəbələrin pəncərələrindən daxil olaraq alovu söndürməyə çalışdıqları müşahidə olunub.
Hazırda səlahiyyətli orqanlar yanğının başvermə səbəblərini araşdırır.
Məktəb rəhbərliyi və fövqəladə hallar xidməti vəziyyətin nəzarət altına alındığını təsdiqləyib.
