Ukrayna Ali Radasında Rusiya ilə mümkün sülh müqaviləsini kimin imzalayacağı ilə bağlı müzakirələr davam edir.
“Operativ Məlumat Mərkəzi – OMM” xəbər verir ki, bu barədə deputat Nina Yujanina noviny.live “YouTube” kanalında açıqlama verib.
Onun sözlərinə görə, Ukraynanın xarici işlər naziri Andrey Sibiha ilə bu yaxınlarda keçirilən panel müzakirəsi zamanı məsələ ətrafında növbəti qalmaqal yaşanıb. Belə ki, deputatlar sənəddə kimin imzasının olacağı sualını dəfələrlə səsləndirsələr də, nazir bu suala konkret cavab verməyib.
Yujanina qeyd edib ki, Konstitusiyaya əsasən, beynəlxalq sülh müqavilələrinin imzalanması prezidentin səlahiyyətinə daxildir. Lakin bu məqam xatırladılsa belə, Andrey Sibiha məsələyə aydınlıq gətirməkdən yayınıb.
Deputatın sözlərinə görə, müzakirələr Ali Radada hələ də açıq qalır və mövzu ətrafında fikir ayrılıqları mövcuddur.
