Fransanın şimalında çərşənbə axşamı səhər saatlarında yüksəksürətli qatarın hərbi avadanlıq daşıyan yük maşını ilə toqquşması nəticəsində qatarın maşinisti həyatını itirib.
"Operativ Məlumat Mərkəzi-OMM" xarici KİV-ə istinadən xəbər verir ki, hadisə zamanı 16 nəfər yaralanıb, onlardan ikisinin vəziyyəti kritikdir.
Qəza baş verən an qatarda 200-dən çox sərnişinin olduğu bildirilir.
Dövlətə məxsus "SNCF" dəmir yolu şirkətinin açıqlamasında qeyd olunur ki, qəza yerli vaxtla saat 07:00 radələrində Bully-les-Mines qəsəbəsi yaxınlığında baş verib.
Fransanın nəqliyyat naziri Filip Tabaro "X" sosial şəbəkəsindəki paylaşımında qəzanın Pas-de-Kale regionunda, Lans şəhəri ilə Betün qəsəbəsi arasında baş verdiyini təsdiqləyib.
Nazir hadisə yerinə yola düşdüyünü və "SNCF" rəhbərliyi ilə əlaqə saxladığını vurğulayıb.
Regional dəmir yolu operatoru "TER" isə Betün-Lans xətti üzrə hərəkətin günün sonuna qədər dayandırıldığını elan edib. Həmkarlar ittifaqının rəsmisi sərnişinlərin xəsarətlərinin həyati təhlükə daşımadığını bildirib.
