Türkiyə qlobal diplomatiyanın mühüm tədbirlərindən biri olan 36-cı NATO Dövlət və Hökumət Başçıları Zirvəsinə ev sahibliyi etməyə hazırlaşır.
“Operativ Məlumat Mərkəzi-OMM” xəbər verir ki, ABŞ Prezidenti Donald Tramp Türkiyə Prezidenti Rəcəb Tayyib Ərdoğanın dəvəti ilə Ankaraya səfər edəcək.
Məlumata görə, iki gün davam edəcək səfər çərçivəsində Türkiyə və ABŞ arasında müdafiə, ticarət, investisiya və strateji əməkdaşlıq məsələləri müzakirə olunacaq. Liderlərin regional və qlobal gündəmdəki aktual mövzular ətrafında fikir mübadiləsi aparacağı gözlənilir.
Səfərin ilk günündə Donald Trampın əsas dayanacağı Ankara şəhərində yerləşən Beştəpə Prezident Kompleksi olacaq. Burada ABŞ lideri Prezident Rəcəb Tayyib Ərdoğan tərəfindən rəsmi mərasimlə qarşılanacaq. Daha sonra iki lider arasında təkbətək görüş keçiriləcək.
Səfərin ikinci günü isə NATO Zirvəsi ilə bağlı tədbirlər ön plana çıxacaq. Tramp liderlərin rəsmi qarşılanma mərasimində iştirak edəcək, ənənəvi “ailə şəkli” çəkilişinə qatılacaq və NATO Liderlərinin İşçi Sessiyasında iştirak edəcək.
Zirvə çərçivəsində ABŞ Prezidentinin bir sıra ikitərəfli görüşlər keçirməsi də planlaşdırılır. Məlumata görə, Tramp Ukrayna Prezidenti Volodimir Zelenski və Suriya Prezidenti Əhməd Şara ilə ayrıca görüşlər keçirəcək.
Səfərin sonunda Donald Tramp mətbuat konfransı keçirərək Ankara təmasları və NATO Zirvəsinin nəticələri ilə bağlı açıqlamalar verəcək. Daha sonra ABŞ Prezidenti Türkiyədən ayrılaraq Vaşinqtona yola düşəcək.
