Bazar ertəsi (13 aprel) ABŞ-nin İran gəmilərinə blokada tətbiq etməyə başlaması ilə neft qiymətləri kəskin bahalaşıb.
"Operativ Məlumat Mərkəzi-OMM" xəbər verir ki, həftəsonu sülh danışıqlarının nəticəsiz qalması fonunda dollar dəyər qazanıb, səhmlər və istiqrazlar isə ucuzlaşıb.
ABŞ-nin Tehranı təzyiq altında saxlamaq məqsədi daşıyan bu addımı Yaxın Şərqdə enerji ixracı ilə bağlı qeyri-müəyyənliyi daha da artırır.
"Brent" markalı xam neftin fyuçersləri 7,3% artaraq bir barel üçün 102 dollara çatıb.
Müharibə Hörmüz boğazında naviqasiyanı dayandırdıqdan bəri bu, 40%-dən çox artım deməkdir. Asiya sessiyasında "S&P 500" fyuçersləri 0,7%, Avropa fyuçersləri isə 1,4% ucuzlaşıb. Yaponiyanın 10 illik istiqraz gəlirliliyi 2,49%-ə çataraq son 29 ilin ən yüksək səviyyəsinə qalxıb.
"MST Marquee" analitiki Saul Kavonic bildirib ki, bazar hazırda atəşkəsdən əvvəlki vəziyyətə qayıdıb.
Əsas sual ABŞ-nin İrana qarşı zərbələri yeniləyib-yeniləməyəcəyidir ki, bu da regiondakı enerji infrastrukturuna uzunmüddətli təsir göstərə bilər.
"Wall Street Journal" nəşrinin məlumatına görə, rəsmilər İrana qarşı məhdud zərbələr endirməyi nəzərdən keçirirlər. Valyuta bazarlarında avro 0,3% ucuzlaşaraq 1,1687 dollara düşüb, Asiya birjalarında isə əsas indekslər təxminən 1% dəyər itirib.
