ABŞ və Cənubi Koreya arasında keçirilən illik birgə hərbi təlimlərin miqyası və müddəti azaldılır.
“Operativ Məlumat Mərkəzi – OMM” xəbər verir ki, qərar ABŞ Prezidenti Donald Trampın Amerika qüvvələrinin təlimlərdə iştirakının azaldılması ilə bağlı göstərişindən sonra qəbul edilib.
Avqustun 17-də başlayan “Ulchi Freedom Shield” təlimlərinin ilkin olaraq avqustun 27-dək davam etdirilməsi nəzərdə tutulsa da, yeni qərara əsasən təlimlər avqustun 21-də başa çatdırılacaq.
Dəyişikliklər yalnız təlimlərin müddəti ilə məhdudlaşmır. ABŞ və Cənubi Koreyanın bəzi sahə manevrlərini azaltması, digər canlı təlim fəaliyyətlərini isə ləğv edərək kompüter simulyasiyaları ilə əvəzləməsi planlaşdırılır.
Cənubi Koreyanın müdafiə naziri An Gyu-bak bildirib ki, əks-hücum əməliyyatlarını əhatə edən təlimlərin ikinci mərhələsi tamamilə ləğv edilib.
Bununla belə, Pentaqon rəsmiləri dəyişikliklərin ABŞ-nin təlim məqsədlərinə xələl gətirməyəcəyini və müttəfiqlərin hərbi hazırlıq səviyyəsinin qorunacağını bildirirlər.
Qərarın gözlənilməz olması Seulda da müzakirələrə səbəb olub. Cənubi Koreyanın xarici işlər naziri Ço Hyun parlamentdə çıxışı zamanı bildirib ki, nə Seul, nə də Vaşinqton rəsmiləri Trampın qərarından əvvəlcədən xəbərdar olublar.
Analitiklər təlimlərin azaldılmasını ABŞ və Cənubi Koreya arasında İranla bağlı münaqişəyə dair fikir ayrılıqları və Vaşinqtonun Seuldan daha çox dəstək gözləntisi ilə əlaqələndirirlər.
Şimali Koreya isə ABŞ və Cənubi Koreyanın birgə hərbi təlimlərini yenidən tənqid edərək, tərəfləri “müharibə qızışdıranlar” adlandırıb. Bununla belə, Pxenyanın Trampın təlimlərin azaldılması qərarına birbaşa reaksiya verməməsi diqqət çəkib.
Mütəxəssislər bu yanaşmanı Şimali Koreyanın ABŞ ilə diplomatik kanalları açıq saxlamaq niyyəti ilə əlaqələndirirlər.
Tramp isə təlimlərin azaldılması qərarını Şimali Koreya lideri Kim Çen Inla münasibətlərinin “çox yaxşı” olması ilə əsaslandırıb.
