BMT-nin Azərbaycandakı nümayəndəliyi, eləcə də Slovakiya, Niderland, Belçika və Litvanın ölkəmizdəki səfirlikləri 28 May - Müstəqillik Günü münasibətilə təbrik mesajları yayımlayıblar. "Operativ Məlumat Mərkəzi-OMM" xəbər verir ki, diplomatik missiyalar öz rəsmi sosial şəbəkə səhifələrində Azərbaycan xalqına xoş arzularını çatdırıblar.
BMT-nin Azərbaycandakı nümayəndəliyi xalqımızı bayram münasibətilə təbrik edib. Slovakiyanın Bakıdakı səfirliyi isə Azərbaycan xalqına sülh, firavanlıq və gələcək fəaliyyətində uğurlar arzulayıb.
Niderlandın Azərbaycandakı səfirliyi də təbrikə qoşularaq, Azərbaycan xalqına səmimi arzularını çatdırıb. Belçika səfirliyi öz mesajında Azərbaycan xalqının müstəqilliyini, milli mədəniyyətini və ənənələrini qorumaq əzmini xüsusi vurğulayıb.
Litva səfirliyi isə iki ölkə arasındakı dostluq münasibətlərini və əməkdaşlığı yüksək qiymətləndirdiyini bildirib. Paylaşımda tərəfdaşlığın və xalqlar arasında əlaqələrin gələcəkdə daha da möhkəmlənəcəyinə ümid ifadə olunub.
