“Ukraynaya humanitar yardıma və sistemli dəstəyə görə Azərbaycan Prezidentinə və dost Azərbaycan xalqına təşəkkür edirəm”.
"Operativ Məlumat Mərkəzi-OMM" xəbər verir ki, bunu “Ukrayna-Azərbaycan: qlobal dünya nizamına çağırışlar qarşısında strateji tərəfdaşlıq. Üçüncü dialoq” adlı dəyirmi masada Ukrayna Ali Radasının deputatı, Energetika və mənzil-kommunal təsərrüfatı komitəsinin üzvü, enerjiyə qənaət və enerji səmərəliliyi üzrə alt komitənin rəhbəri Sergey Naqornyak deyib.
“Azərbaycan Prezidenti İlham Əliyev humanitar yardım çərçivəsində Ukraynaya elektrik avadanlıqlarının satın alınması və göndərilməsi üçün əlavə 7,6 milyon ABŞ dolları məbləğində vəsaitin ayrılması haqqında sərəncam imzalayıb. Bu yardıma, Rusiyanın genişmiqyaslı müharibəsindən sonra hiss etdiyimiz sistemli dəstəyə görə Azərbaycan Prezidentinə və dost Azərbaycan xalqına təşəkkür etmək istəyirəm. Azərbaycanın ərazi bütövlüyümüzü dəstəkləməsi bizim üçün vacibdir. Genişmiqyaslı müharibədən sonrakı ilk günlərdə Azərbaycan Ukraynaya böyük humanitar yardım partiyası, xüsusən də dərman və tibbi avadanlıqlar göndərib və o vaxtdan bəri humanitar yardım sistemli şəkildə həyata keçirilir”, - o bildirib.
S.Naqornyak əlavə edib ki, ölkə üçün kritik bir dövrdə Azərbaycan da Ukraynanın enerji sektoruna töhfə verib: “Biz 2022-2023-cü illərdəki qış mövsümünü olduqca çətin keçirdik və Azərbaycan öz köməyi ilə bu çətin dövrdən çıxmağımıza yardım göstərib. İndi Ukraynanın enerji sektoruna da yardım ayrılıb. Bu, bizim üçün çox vacibdir, çünki biz enerji sistemini bərpa edir və qışa hazırlaşırıq”.
