UEFA Gənclər Liqasının "Antverpen"lə oyunundan sonra yoxa çıxaraq ölkəsinə qayıtmayan Ukraynanın "Şaxtyor" klubunun 19 yaşadək futbolçulardan ibarət komandasının yarımmüdafiəçisi Aleksandr Rosputko Rusiyaya qaçıb.
"Operativ Məlumat Mərkəzi-OMM" xəbər verir ki, futbolçunun atası oğlunun sözügedən ölkə ərazisində olduğunu təsdiqləyib.
Artıq Rosputkonun maraqlarını təmsil edən agentlik onunla bütün əlaqələri kəsib. “Şaxtyor” da futbolçusunun qaçması ilə bağlı öz rəsmi mövqeyini ifadə edərək, onunla müqaviləyə xitam verildiyini açıqlayıb: “Komandanın düşərgəsinə qayıtmaması və müqavilə üzrə öhdəlikləri yerinə yetirməkdən faktiki imtina ilə əlaqədar “Şaxtyor” futbolçu Aleksandr Rosputko ilə müqaviləyə xitam verib”.
Rosputko UEFA Gənclər Liqasında “şaxtaçılar”ın heyətində 13 oyun keçirib.
