OMM Redaksiyası
ABŞ-ın Las-Veqas şəhərində keçmiş dəstə lideri Duen “Keffe D” Devis 1996-cı ildə hip-hop ulduzu Tupak Şakurun qətlə yetirilməsi ilə bağlı 40 ildən ömürlük həbs cəzasına məhkum edilib. Reuters-in məlumatına görə, məhkəmə hökmü çərşənbə axşamı elan olunub.
63 yaşlı Devis avqustda andlılar heyəti tərəfindən birinci dərəcəli qətldə təqsirli bilinmişdi. O, qətl və ölümcül silahdan istifadə ittihamları üzrə ardıcıl olaraq 20 ildən ömürlük həbs olmaqla iki cəza çəkəcək.
Məhkəmədə təxminən bir saat davam edən iclas zamanı Devis emosiyasını büruzə verməyib. O, çəkdiyi müddətin cəzasından çıxılması ilə bağlı hakimlə qısa mübahisə edib. Məhkəməyə son dəfə müraciət etmək imkanı veriləndə isə evindən istintaq zamanı götürülən əşyaların qaytarılmasını istəyib.
Qətlin sifarişçisi barədə hökm çıxarılıb
Devis 2023-cü ildə həbs edilənədək Şakurun qətli ABŞ-da təxminən üç onillik ərzində açılmamış ən məşhur cinayət işlərindən biri sayılırdı. 25 yaşlı reper Las-Veqasda avtomobildən açılan atəş nəticəsində öldürülmüşdü. Həmin vaxt onu musiqi sənayesi təmsilçisi Marion “Suge” Naytın idarə etdiyi yolsuzluq avtomobilində sərnişin oturacağında idi.
Şakurun qətlinə görə indiyədək ittiham olunan yeganə şəxs Devisdir. Bununla belə, ölümcül atəşi kimin açdığı qəti şəkildə müəyyən edilməyib.
Prokurorluğun mövqeyinə görə, Devis qətli Şakurun və onun ətrafındakı şəxslərin 1996-cı il sentyabrın 7-də Las-Veqas Stripindəki “MGM Grand” kazinosunda Devisin qardaşı oğlunu döyməsinə görə qisas almaq məqsədilə təşkil edib. Rəsmilər Devisin qətlə bağlılığından uzun müddət şübhələnsələr də, onu ittiham etmək üçün kifayət qədər sübut olmadığını bildiriblər.
İstintaqın gedişində Devisin mediaya verdiyi açıqlamalar və xatirə kitabı, eləcə də onun müstəntiqlərlə gizli görüşlərinin audioyazıları ittiham tərəfinin işində əsas materiallar olub. Devis “Compton Street Legend” kitabında həm Şakurun, həm də rəqib reper Kristofer Uollesin qətlləri üzrə şübhəli sayıldığını yazıb.
Şakurun bacısı məhkəmədə çıxış edib
Reperin bacısı Sekiyva Şakur məhkəmədə qurbanın yaxınlarının adından çıxış edərkən göz yaşlarını saxlaya bilməyib. 51 yaşlı Sekiyva bildirib ki, anaları qardaşını insan hüquqları fəalı kimi yetişdirib və dünyanı yaxşılığa doğru dəyişə biləcəyinə inandırmağa çalışıb.
Şakurun qətlindən bir neçə ay əvvəl yayımlanan “All Eyez on Me” albomu onun qanundankənar obrazını əks etdirirdi. Reper 2017-ci ildə “Rock and Roll Hall of Fame”ə daxil edilib.
