ABŞ prezidentinin xüsusi nümayəndəsi Stiven Uitkoff Ukrayna münaqişəsinin nizamlanması ilə bağlı aparılan danışıqlarda əhəmiyyətli irəliləyişin olduğunu bəyan edib.
“Operativ Məlumat Mərkəzi-OMM” xəbər verir ki, bu barədə diplomat Cenevrədə keçirilən üçtərəfli müzakirələrin ilk gününün yekunlarına dair özünün "X" hesabında paylaşım edib.
Uitkoffun sözlərinə görə, ABŞ Ukrayna və Rusiya arasında keçirilən bu danışıqlarda moderator qismində çıxış edib.
O, hazırkı administrasiyanın münaqişə tərəflərini bir araya gətirməsini böyük uğur adlandırıb və bunun ciddi nəticələrə yol açdığını vurğulayıb.
Xüsusi nümayəndə qeyd edib ki, hər iki tərəf müzakirələrin nəticələri barədə öz ölkə rəhbərlərinə məlumat vermək və yekun razılaşmanın əldə olunması istiqamətində işləri davam etdirmək barədə razılığa gəliblər.
Qeyd edək ki, danışıqlar 17-18 fevral tarixlərində Cenevrədə baş tutub. Görüşlər "InterContinental Geneva" otelində təşkil edilib. Müzakirələrdə əsas məqsəd sülh sazişinin detallarını razılaşdırmaqdır.
Xatırladaq ki, Rusiya, ABŞ və Ukrayna nümayəndə heyətlərinin iştirak etdiyi növbəti raund danışıqlar beynəlxalq ictimaiyyətin diqqət mərkəzindədir.
