Afət Ziyadqızı
Türkiyənin Salda gölü və onun Mars planetilə geoloji oxşarlıqlarından bəhs edən “Salda: Qırmızı planetə körpü” sənədli filmi oktyabrın 9-da 77-ci Beynəlxalq Astronavtika Konqresinin (IAC) İctimai Günündə nümayiş olunacaq.
"Operativ Məlumat Mərkəzi-OMM" xəbər verir ki, "Anadolu" agentliyinin istehsalı olan 72 dəqiqəlik sənədli film ölkənin cənub-qərbindəki Burdur vilayətində yerləşən Salda gölünün geoloji, ekoloji və bioloji xüsusiyyətlərini, həmçinin Mars tədqiqatları baxımından strateji əhəmiyyətini araşdırır.
Atakan Kerküklünün rejissoru və prodüseri olduğu ekran əsərində Türkiyə və ABŞ-ın aparıcı alimlərinin, yer elmləri mütəxəssislərinin, bioloqların və ABŞ Milli Aeronavtika və Kosmos İdarəsinin (NASA) ekspertlərinin elmi qənaətləri yer alır. Filmdə gölün nadir geoloji strukturu ilə yanaşı, onun həssas təbii ekosisteminin qorunmasının vacibliyi vurğulanır.
Qeyd edək ki, Beynəlxalq Astronavtika Federasiyasının (IAF) təşkilatçılığı ilə keçirilən dünyanın ən böyük kosmik tədbiri oktyabrın 5-dən 9-dək Antalyadakı “NEST” Konqres və Sərgi Mərkəzində baş tutur. Konqres Türkiyə Respublikasının Sənaye və Texnologiya Nazirliyinin koordinasiyası, Türkiyə Kosmik Agentliyi (TUA) və “SAHA İstanbul”un həmev sahibliyi ilə təşkil olunub.
