Praktiki olaraq yaxşı çıxış etdik. Bilirdim ki, fərdi bacarıqları yüksək olan oyunçularım var. Mənim işim bu fərdi keyfiyyətləri sistemli komanda oyununa çevirmək idi.
"Operativ Məlumat Mərkəzi-OMM" xəbər verir ki, bu sözləri “Sabah” basketbol komandasının baş məşqçisi Boban Mitev FIBA Avropa Kubokunda Rumıniyanın “Rapid” klubuna 90:71 hesabı ilə qalib gəldikləri oyundan sonra klubun mətbuat xidmətinə açıqlamasında deyib.
Ölkəsində keçirilən turnirə minimum bir oyunda qələbə qazanmaq üçün gəldiklərini söyləyən Şimali makedoniyalı mütəxəssis bildirib: “Bəzi epizodlarda ribaundda, bəzən müdafiədə və atışlarda uğursuz olsaq da, bu oyun qrupda keçirdiyimiz ən yaxşı qarşılaşma idi. Oyunçular əsl döyüşçü kimi mübarizə apardılar. Biz düzgün yoldayıq. Belə düşünməyə nikbin əsaslarım var. Bakıda keçirəcəyimiz avrokubok oyunlarında tribunaları dolu görmək istəyirəm”.
Qeyd edək ki, A qrupunu lider olaraq tamamlayan “Sabah” müntəzəm mövsümdə iştirak hüququna yiyələnib. Azərbaycan çempionu Avropa Kubokunun bu mərhələsində D qrupunda mübarizə aparacaq. Komandanın rəqibləri “Mornar” (Monteneqro), “Baxçaşehir” (Türkiyə) və “Nimbruk” (Çexiya) klubları olacaq.
“Sabah” qrupda ilk oyununu oktyabrın 18-də səfərdə "Mornar" klubuna qarşı olacaq.
