Rusiyalı deputat Dmitri Savelyev Federasiya Şurasında saxlanılıb.

"Operativ Məlumat Mərkəzi-OMM" xəbər verir ki, bu  barədə Rusiya KİV-ləri məlumat yayıb. 

Bildirilir ki, o, qətlin təşkilində iştirakda şübhəli bilinir. Bununla yanaşı,  Rusiya Federasiya Şurasının məlumatına görə,  Dmitri Savelyev toxunulmazlığından məhrum edilib. 

Dmitri Savelyev Federasiya Şurasında Tula vilayətini təmsil edir. O, 2016-cı ildə parlamentin yuxarı palatasına daxil olub. 1999-cu ildə ilk dəfə Dövlət Dumasına deputat seçilib, "Sağ Qüvvələr İttifaqı" fraksiyasının üzvü olub, daha sonra "Rodina" partiyasından namizədliyi irəli sürülüb, 2007-ci ildə isə "Vahid Rusiya"dan seçilib. O, fraksiya sədrinin birinci müavini olub.

Türkiyənin şərqindəki Tunceli vilayətində zirehli hərbi maşının qəzaya uğraması nəticəsində dörd hərbçi həlak olub, bir çavuş yaralanıb.

"Operativ Məlumat Mərkəzi-OMM" xəbər verir ki, hadisə Ovacık və Hozat rayonları arasındakı Karaoğlan bölgəsində baş verib.

İdarəetməni itirərək aşan maşının Jandarmeriya Komandanlığına aid olduğu bildirilir.

Hadisə ilə bağlı daxili işlər naziri Ali Yerlikaya həlak olan hərbçilərin ailə üzvlərinə baş sağlığı verib.

Türkiyənin Diyarbəkir şəhərində 19 gündür itkin düşən 8 yaşlı Narin Güranın meyiti Tavşantəpə kəndi ərazisində tapılıb.

"Operativ Məlumat Mərkəzi-OMM" xəbər verir ki, bu barədə Türkiyənin daxili işlər naziri Ali Yerlikaya sosial şəbəkə hesabında paylaşım edib.

“Təəssüflər olsun ki, Diyarbəkirin Bağlar mahalının Tavşantepe kəndində itən qızımız Narinin cansız bədəni Axtarış xilasetmə qruplarımız tərəfindən tapılıb. Narin qızımıza Allahdan rəhmət, ailəsinə başsağlığı veririk” ,- nazir qeyd edib.

Xatırladaq ki, Narin Gürənin rezonans yaradan işində istintaq çərçivəsində əvvəl onun qardaşı, daha sonra əmisi saxlanılıb.

Qolundakı diş izlərinə görə şübhəli bilinən qardaş artıq sərbəst buraxılıb.

Azyaşlının əmisi, həm də Tavşantəpə kəndinin muxtarı olan Sami Güran isə hələ də şübhəlilər sırasındadır. O, həbs tələbi ilə məhkəməyə göndərilib.

İran Prezidenti Məsud Pezeşkian ölkə hakimiyyətinin paytaxtı daha cənuba köçürmək niyyətini açıqlayıb.

"Operativ Məlumat Mərkəzi-OMM" xəbər verir ki, bu barədə xarici KİV məlumat yayıb.

Pezeşkianın sözlərinə görə, iqtisadi səbəblərdən Tehranın respublikanın əsas şəhəri kimi qalması artıq mümkün deyil.

Prezident aydınlaşdırıb ki, yeni paytaxtın Fars körfəzi sahillərinə yaxın yerləşməsi daha düzgün olar.

Qeyd edək ki, indiki paytaxt İranın şimalında, Elbrus dağ silsiləsinin ətəyində, Xəzər dənizi sahilindən 90 km cənubda yerləşir. Tehran 1786-cı ildə ölkənin əsas şəhəri olub.

İranda Zəngəzur dəhlizilə bağlı narahatlıq güclənib.

"Operativ Məlumat Mərkəzi-OMM" xəbər verir ki, İran parlamentinin Milli təhlükəsizlik və xarici siyasət komissiyasının sədri İbrahim Əzizi Zəngəzur dəhlizini əleyhinə çıxış edib.

O "Mehr" agentliyinə deyib ki, İslam Respublikası Zəngəzur dəhlizini “qırmızı xətt” hesab edir və sərhəddə hər hansı dəyişikliyə qəti cavab verəcək.

İbrahim Əzizinin sözlərinə görə, Zəngəzur dəhlizinə dair geosiyasi proseslər İranın marağında deyil. 

İranlı deputat deyib ki, ölkəsinin ərazi bütövlüyünə təhlükə yaranarsa, rəsmi Tehran özünü müdafiə edəcək.

İranlı parlamentarın açıqlaması Ermənistanda az qala toy-bayram səviyyəsində qarşılanıb. Belə ki, Ermənistan KİV-ləri İbrahim Əzizinin bəyanatını sürətlə tirajlayıblar.

Qeyd edək ki, bu, son bir həftədə İran rəsmilərinin Zəngəzur dəhlizi ilə bağlı üçüncü səs-küylü bəyanatıdır. Bundan əvvəl İranın Ermənistandakı səfiri Mehdi Sobhani və xarici işlər naziri Abbas Araqçi də oxşar açqılama ilə çıxış ediblər. 

İran Prezidenti Məsud Pezeşkian BRİCS-in zirvə toplantısında iştirak etmək üçün Tatarıstanın paytaxtı Kazana səfər edəcək.

"Operativ Məlumat Mərkəzi-OMM" TASS-a istinadən xəbər verir ki, bu barədə İranın Rusiyadakı səfiri Kazem Cəlali bildirib.

Məlumata görə, səfər çərçivəsində onun Rusiya Prezidenti Vladimir Putinlə görüşü də planlaşdırılıb.

Səfir bildirib ki, səfər və görüşlərlə bağlı hazırlıq işləri görülür. O əlavə edib ki, Məsud Pezeşkianın Vladimir Putinlə yanaşı, başqa ölkələrin liderləri ilə ikitərəfli, Rusiyadakı İran ictimaiyyəti ilə görüşü, sammitdə çıxışı nəzərdə tutulub.

Qeyd edək ki, BRİCS-in zirvə toplantısı 2024-cü ilin oktyabrında Kazanda keçiriləcək.