Qətərə məxsus mayeləşdirilmiş təbii qaz (LNG) daşıyan gəmi İranın tətbiq etdiyi yeni qaydalar fonunda Hörmüz boğazından təhlükəsiz şəkildə keçib.
“Operativ Məlumat Mərkəzi-OMM” xəbər verir ki, gəmi İran hakimiyyətinin müəyyən etdiyi xüsusi marşrutdan istifadə edib və Tehranın icazəsi ilə heç bir insident yaşamadan beynəlxalq sulara daxil olub.
Məlumata görə, bu keçid İranın Hörmüz boğazında yeni məhdudiyyətlər tətbiq etməsindən sonra baş verib.
Təxminən üç həftə əvvəl İran rəsmiləri ABŞ-ni əvvəlki razılaşmaları pozmaqda ittiham edərək, boğazdan keçən gəmilərin bundan sonra İran tərəfinin xüsusi icazəsini almalı olduğunu açıqlamışdı.
Qeyd olunur ki, sözügedən gəmi yeni qaydaların qüvvəyə minməsindən sonra Hörmüz boğazından keçən ilk Qətər LNG daşıyıcısı olub.
Hadisə zamanı hər hansı gərginlik, maneə və ya təhlükəsizlik insidenti qeydə alınmayıb.
