Tariximizdə ilk dəfə olaraq ölkəmizin bütün ərazisində Azərbaycan Respublikasının Prezidenti seçkiləri keçiriləcəkdir.
Bu sözləri Qafqaz Müsəlmanları İdarəsinin (QMİ) sədri, şeyxülislam Allahşükür Paşazadə QMİ-nin Növbədənkənar Prezident seçkiləri ilə bağlı keçirilən ümumi iclası zamanı deyib.
"Ən yeni tariximizdə yeni mərhələni ehtiva edən bu seçkilər müstəqil Azərbaycanda qalib xalqın zəfər qürurlu ilk seçkisidir. Xüsusi əhəmiyyət daşıyan bu seçkilər biz, dindarlar, din xadimləriü çün özəl məna kəsb edir. Şükürlər olsun, artıq məscidlərimiz əsarətdən qurtulub, Qarabağın məscidlərində Azan səslənir, bayram namazları qılınır, imamlarımız dini vəzifələrini yerinə yetirirlər".
Şeyxülislam qeyd edib ki, Qarabağ torpağı əsl sahiblərinə qaytarılıb, məcburi köçkünlərimiz öz dədə-baba yurdlarına qayıdırlar, tarixi məscid və ziyarətgahlarımız yenidən dirçəldilir, nəfis şəkildə bərpa olunur.
