Azərbaycan Respublikasının Prezidenti İlham Əliyev mayın 28-də Xocalı rayonunun Daşbulaq kəndində hərbi qulluqçuların istifadəsinə veriləcək fərdi evlərdə yaradılan şəraitlə tanış olub. Dövlət başçısına görülən işlər barədə ətraflı məlumat verilib.
Məlumata əsasən, yaşayış məntəqəsində ümumilikdə 191 fərdi ev mövcuddur. Evlərin bölgüsü aşağıdakı kimidir:
- 1 ədəd ikiotaqlı;
- 70 ədəd üçotaqlı;
- 93 ədəd dördotaqlı;
- 8 ədəd beşotaqlı;
- 1 ədəd səkkizotaqlı;
- 18 ədəd ikimərtəbəli, yeddiotaqlı ev.
Yaşayış sahələrində hərbçilərin rahatlığı üçün zəruri infrastruktur qurulub, evlər qaz və elektrik enerjisi ilə təchiz edilib. Ərazidə məhəllədaxili yollar yenilənib, park salınıb və Bayraq meydanı inşa olunub.
Qeyd edək ki, hərbi qulluqçuların mənzil-məişət şəraitinin yaxşılaşdırılması dövlət siyasətinin prioritetlərindəndir. Bu istiqamətdə həyata keçirilən layihələr hərbçilərin və onların ailələrinin sosial rifahının yüksəldilməsinə xidmət edir.
