Ermənistanın Baş naziri Nikol Paşinyan və Rusiya Prezidenti Vladimir Putin arasında baş tutan danışıqlarda "Cənubi Qafqaz Dəmir Yolu" şirkətinin konsessiyası məsələsi müzakirə edilib.
“Operativ Məlumat Mərkəzi-OMM” Ermənistan mediasına istinadən xəbər verir ki, bu barədə Baş nazir bu gün brifinqdə jurnalistlərə açıqlayıb.
"Bizim ətraflı söhbətimiz oldu, öz mövqelərimizi və baxışlarımızı bildirdik, eləcə də rusiyalı tərəfdaşlarımızın mövqelərini dinlədik", - deyə Nikol Paşinyan qeyd edib. O vurğulayıb ki, onların Rusiya ilə problemi yoxdur, dostluq münasibətlərini yüksək qiymətləndirirlər və heç bir şəkildə Rusiyanın maraqlarına zərər vurmaq istəmirlər. Həmçinin, tərəflər dialoqu davam etdirmək barədə razılığa gəliblər.
Xatırladaq ki, Rusiyanın Baş nazirinin müavini Aleksey Overçuk TASS-a müsahibəsində məsələyə münasibət bildirmişdi. O qeyd etmişdi ki, "Cənubi Qafqaz Dəmir Yolu" şirkətinin konsessiyasının üçüncü tərəfə satılması üçün heç bir obyektiv səbəb yoxdur.
