Ermənistan və Rusiya arasında təbii qaz tədarükü ilə bağlı uzunmüddətli müqavilələrin mövcud olduğu və tərəflərdən heç birinin öhdəliklərdən birtərəfli qaydada imtina etməsinin real görünmədiyi bildirilib.
“Operativ Məlumat Mərkəzi-OMM” xəbər verir ki, bu barədə Ermənistan Baş naziri Nikol Paşinyan hökumət brifinqində açıqlama verib.
Baş nazir qeyd edib ki, belə addımlar müqavilə əsaslı beynəlxalq praktikaya uyğun deyil: “Bu, belə edilmir. Bu, müqavilə əsasında baş verən davranış növü deyil”.
Paşinyan eyni zamanda Ermənistan hakimiyyətinin mövcud vəziyyətlə bağlı bütün mümkün ssenariləri təhlil etdiyini vurğulayıb.
O, Rusiya Prezidenti Vladimir Putinlə uzunmüddətli iş təcrübəsinə toxunaraq bildirib ki, onu faktlara əsaslanan rasional lider kimi tanıyır və mövcud narahatlıqların dialoq yolu ilə aradan qaldırılacağına ümid edir.
Bu arada Ermənistanın Ərazi İdarəetmə və İnfrastruktur naziri David Xudatyan parlamentdə çıxışı zamanı rusiyalı tərəfdən bir sıra ikitərəfli müqavilələrin ləğvi ilə bağlı bildirişlərin daxil olduğunu açıqlayıb. Nazir risklərin, o cümlədən tariflərlə bağlı mümkün dəyişikliklərin idarə olunduğunu bildirib.
Onun sözlərinə görə, Ermənistan hazırda mövcud razılaşmalara əsasən Rusiya qazını almağa davam edir və tərəflər arasında əməkdaşlıq “konstruktiv və işgüzar” olaraq qalır.
Qeyd edək ki, Ermənistana göndərilən məktubda Rusiya ilə 2013-cü il 2 dekabr tarixli təbii qaz, neft məhsulları və almaz tədarükü üzrə sazişin dayandırılması və ya ləğvi ehtimalının gündəmdə olduğu bildirilib. Sənəddə bu ssenarinin Ermənistanın Avropa İttifaqı istiqamətində irəliləməsi ilə əlaqələndirildiyi qeyd olunur.
Hazırda Ermənistan Rusiyadan təbii qazı min kubmetr üçün təxminən 177,5 dollara alır, Avropa bazarında isə bu qiymətin orta hesabla 550 dollar civarında olduğu bildirilir.
