Dünyanın ən populyar süni intellekt çatbotu olan ChatGPT-də artıq reklamlar görünməyə başlayacaq. OpenAI şirkətinin rəsmi bəyanatına görə, bu qərar qabaqcıl süni intellekt alətlərini daha geniş kütlələr üçün maliyyə baxımından əlçatan etmək və giriş baryerini azaltmaq məqsədi daşıyır.
Reklam bloklarının sınaqlarına yaxın həftələrdə ABŞ-da başlanılacaq. Reklamlar çatbotun cavablarının aşağı hissəsində, yalnız söhbətin konteksti müvafiq məhsul və ya xidmətə uyğun gəldikdə nümayiş etdiriləcək. Yenilik aşağıdakı istifadəçi qruplarına şamil olunacaq:
- Pulsuz versiya istifadəçiləri;
- Yeni təqdim olunan büdcəli ChatGPT Go abunəçiləri.
Şirkətdən bildirilib ki, Plus, Pro, Business və Enterprise abunəçiləri üçün xidmət reklamsız qalacaq. OpenAI vurğulayır ki, reklamlar süni intellektin cavablarının obyektivliyinə təsir etməyəcək, bütün sponsorlu mesajlar aydın şəkildə işarələnəcək və istifadəçi məlumatları reklamçılara satılmayacaq. Həmçinin, 18 yaşdan kiçik şəxslərə və siyasət və ya psixi sağlamlıq kimi həssas mövzularda reklam göstərilməyəcəyi vəd edilir.
Eyni zamanda, OpenAI daha əvvəl anons etdiyi ChatGPT Go tarifini qlobal miqyasda istifadəyə verib. Ayda 8 dollar təşkil edən bu plan (Plus tarifi 20 dollardır) istifadəçilərə mesaj limitlərinin artırılması, təsvirlərin yaradılması, faylların yüklənməsi və "yaddaş" funksiyasına çıxış imkanı təqdim edir.
