OMM Redaksiyası
Britaniyada sifarişli qətl planı ilə bağlı məhkum edilən Norveç vətəndaşı, 19 yaşlı Yohannes Natland 20 il müddətinə təcridxanada saxlanılmağa məhkum edilib. Polis planı həyata keçirilməzdən əvvəl üzə çıxarıb.
Natland 2025-ci ilin martında İngiltərənin şimalındakı Hadersfild şəhərində otel otağında saxlanılıb. Onun yanında iki odlu silah və 19 patron olub. O, iyulda keçirilən təkrar məhkəmə prosesində qətl məqsədilə əlbir olmaqda təqsirli bilinib. Hökm oktyabrın 16-da Vuliç Kral Məhkəməsində çıxarılıb.
Prokurorların sözlərinə görə, Natlandı İsveçin mütəşəkkil cinayətkar qrupu olan “Foxtrot Network” qətlə cəlb edib. Qrup İranla əlaqələrinə görə Böyük Britaniya və ABŞ tərəfindən sanksiyaya məruz qalıb. Bununla belə, Britaniyanın terrorla mübarizə polisi Natlandın işində İranla birbaşa əlaqəyə dair sübut aşkarlanmadığını bildirib.
Qətl üçün 28 min dollar vəd edilib
Natlanda qətli törətmək müqabilində 270 min Norveç kronu, təxminən 28 min dollar vəd olunub. O, 18 yaşı tamam olduqdan az sonra, 2025-ci il martın 17-də müddəti bitmiş adi pasportunun əvəzinə təcili pasportla Stavanger şəhərindən Mançesterə uçub.
Natland Hadersfilddəki otelə yönləndirilib. Orada odlu silahlar, patronlar, nağd pul və saxta nömrə nişanları olan oğurluq avtomobil əvvəlcədən hazırlanmışdı. Müstəntiqlərin bildirdiyinə görə, o, iki silah və 19 patron götürərək otağına qayıdıb.
Norveçdə polis Natlandı cəlb etməkdə şübhəli bilinən yeniyetməni saxlayıb və onun telefonunda cinayət planını üzə çıxaran mesajlar tapıb. Britaniyada hədəf seçilən şəxsin kimliyi indiyədək müəyyənləşdirilməyib.
Məhkəmə zamanı Natland yarımavtomat tapança, revolver və patronlara sahib olduğunu etiraf etsə də, qətl məqsədilə əlbir olmaq ittihamını rədd edib. O, heç kimi öldürmək niyyətində olmadığını və başqalarının gözündə təsir bağışlamaq üçün planını şişirtdiyini deyib.
Məhkəmə şəbəkənin gəncləri cəlb etmə üsulunu tənqid edib
Hakim Çima-Qrub hökmü elan edərkən “Foxtrot Network”ün gəncləri zorakı cinayətlər törətməyə cəlb etdiyini, eyni zamanda hücumlarla əlaqəsini gizlətməyə çalışdığını bildirib.
“Siz bu işi görməyə razı oldunuz və ondan əl çəkmək üçün çoxsaylı imkanınız olsa da, planı davam etdirdiniz”, — hakim Natlanda deyib.
Natlandın vəkili Pol Hains bildirib ki, müvəkkilinin narkotik istifadəsi psixi xəstəliyinə təsir edib və qərarvermə qabiliyyətini zəiflədib. Natland daha əvvəl demək olar ki, hər gün narkotik qəbul etdiyini və bunun təsiri ilə psixoz yaşadığını söyləyib.
Londonun Terrorla Mübarizə Polis İdarəsinin rəhbəri komissar Helen Flanaqan hədəf şəxsin kimliyinin hələ də müəyyən edilmədiyini təsdiqləyib. O, “Foxtrot Network”ün İran hökuməti adından Avropada yəhudi və İsrail hədəflərinə qarşı zorakılıq təşkil etdiyinə görə Böyük Britaniya və ABŞ-ın sanksiyalarına məruz qaldığını deyib.
Flanaqan düşmən dövlətlərin Britaniyada cinayət əməlləri törətmək cəhdlərinin qarşısını almaq üçün polisin fəaliyyətini davam etdirəcəyini bildirib. Natland 20 illik cəzasının azı üçdə ikisini təcridxanada çəkməlidir.
