İsrailin Baş naziri Benyamin Netanyahu qarşıdakı görüşdə ABŞ Prezidenti Donald Trampla Vaşinqtonun Tehrandan raket proqramının inkişafını və Yaxın Şərqdə İranın müttəfiqlərinə dəstəyini dayandırmağı tələb etməsinə nail olmağa çalışacaq.
"Operativ Məlumat Mərkəzi-OMM" xəbər verir ki, "Washington Post" qəzeti mənbələrə istinadən məlumat yayıb.
Bildirilib ki, İsrail həmçinin uranın zənginləşdirilməsinin dayandırılmasını və mövcud ehtiyatların İranın hüdudlarından kənara çıxarılmasını istəyir.
Bu təkliflər ABŞ liderinin xüsusi nümayəndəsi Stiv Uitkoff və sahibkar Cared Kuşnerlə onların ABŞ və İran arasında Omanda keçiriləcək danışıqlardan əvvəl İsrailə səfəri zamanı müzakirə edilib.
Nəşrin həmsöhbətinin sözlərinə görə, Netanyahu öz mövqeyini birbaşa Trampa çatdırmaq niyyətindədir.
ABŞ dövlət katibi Marko Rubio və Amerika administrasiyasının digər nümayəndələri dəfələrlə bildiriblər ki, bu tələblər Vaşinqtonun danışıqlar mövqeyinə daxildir. Lakin Tramp yalnız məqsədinin İranın nüvə silahı əldə etməsinin qarşısını almaq olduğunu deyib.
WP-nin qeyd etdiyi kimi, bu mövqe Tehranda qəbul edilə bilən razılaşmanın əldə olunması ehtimalına dair “ehtiyatlı optimizm” yaradıb. İran hakimiyyəti dəfələrlə bəyan edib ki, nüvə silahı hazırlamaq niyyətində deyil və xarici siyasət imkanlarının və ya müdafiə potensialının məhdudlaşdırılması ilə bağlı danışıqlar aparmayacaq.
WP-yə danışan və İranla əlaqələri olan Avropa siyasi dairələrinin nümayəndəsi bildirib ki, Tehranda Vaşinqtonla yeni qarşıdurmanın qaçılmaz olduğu düşünülür və Maskatda aparılan hazırkı danışıqlar yalnız ABŞ-ın mümkün hərbi əməliyyatını gecikdirə bilər.
Fevralın 6-da Omanda İranın nüvə proqramı ətrafında böhranın tənzimlənməsi ilə bağlı İran və ABŞ arasında danışıqların növbəti mərhələsi keçirilib. İran nümayəndə heyətinə xarici işlər naziri Abbas Araqçi, ABŞ nümayəndə heyətinə isə Uitkoff rəhbərlik edib. Daha əvvəl Ağ Ev İslam Respublikasına qarşı güc tətbiqi imkanını ciddi şəkildə nəzərdən keçirdiyini bildirmişdi.
