“Milan” Strahinya Pavloviçlə müqaviləni 2031-ci ilədək uzatdı

“Milan” mərkəz müdafiəçisi Strahinya Pavloviçlə yeni uzunmüddətli müqavilə imzalayıb. Serbiyalı futbolçunun İtaliya klubu ilə anlaşması 2031-ci il iyunun 30-dək qüvvədə olacaq. Müqavilədə müddətin uzadılması üçün seçim imkanı da yer alıb.

Klubun açıqlamasında Pavloviçin komandadakı roluna diqqət çəkilib. Bildirilib ki, futbolçu 2024-cü ilin iyulunda “Milan”a keçdikdən sonra inkişaf edib və peşəkarlığı, xarizması, liderlik keyfiyyətləri, eləcə də kluba bağlılığı ilə kollektivin vacib üzvlərindən birinə çevrilib.

Pavloviç 2024-cü ilin yayında “Zalsburq”dan 18,5 milyon avroya “Milan”a transfer olunub. O, İtaliya klubunun heyətində 80 oyuna çıxıb, bu matçların 75-də start heyətində yer alıb və 7 qol vurub.

25 yaşlı müdafiəçinin cari mövsümdə bütün turnirlərdə keçirdiyi 7 rəsmi görüşdə 1 məhsuldar ötürməsi var.