ABŞ Dövlət Departamentinin adı açıqlanmayan yüksək vəzifəli rəsmisi İsrailin Livanın cənubundakı bufer zonasının bir hissəsindən geri çəkildiyini iddia edib.
“Operativ Məlumat Mərkəzi-OMM” xəbər verir ki, “Reuters” agentliyinə danışan ABŞ rəsmisi bu addımı Livanın legitim hökumətinə qarşı xoşməramlı jest kimi qiymətləndirib.
Məlumata görə, ABŞ tərəfi hesab edir ki, İsrailin atdığı bu addım Livan Silahlı Qüvvələrinə bölgədəki terrorçu infrastrukturun və silahların aradan qaldırılması üçün daha əlverişli şərait yaradacaq.
Bildirilib ki, Vaşinqton bu modelin yerindən edilmiş ailələrin təhlükəsiz şəkildə öz evlərinə qayıtmasına və Livanın tam suverenliyinin bərpasına töhfə verəcəyini düşünür.
Lakin qeyd olunub ki, ABŞ rəsmisinin açıqlamaları həm İsrail, həm də Livan tərəfi tərəfindən təkzib edilib.
Məlumata əsasən, İsrail Müdafiə Nazirliyinin yüksək rütbəli nümayəndəsi ölkəsinin siyasətində heç bir dəyişiklik olmadığını vurğulayaraq, İsrail ordusunun Livanın cənubundakı bufer zonasından geri çəkilməyəcəyini bəyan edib.
Bildirilib ki, Livan ordusunun yüksək rütbəli hərbi rəsmisi də oxşar mövqe sərgiləyib. O, son günlər bölgədə müşahidə olunan vəziyyətin geri çəkilmə ilə bağlı iddiaların əksini göstərdiyini bildirib.
Qeyd olunub ki, hərbi rəsminin sözlərinə görə, İsrail qüvvələri bufer zonasına yaxınlaşan şəxslərə, o cümlədən Livan ordusunun bölmələrinə qarşı nəzarəti və təhlükəsizlik tədbirlərini davam etdirir.
