İsrailin Livanın cənubundakı Suri rayonunda yerləşən tibb mərkəzinə endirdiyi hava hücumu nəticəsində 4 nəfər həlak olub.
"Operativ Məlumat Mərkəzi-OMM"xəbər verir ki, bu barədə Livan Milli Xəbər Agentliyi (NNA) məlumat yayıb.
Məlumata görə, hücum zamanı 2 təcili yardım əməkdaşı da yaralanıb.
Bundan əlavə, Livanın cənubundakı Təbninə şəhərində yerləşən xəstəxananın yaxınlığına da hava zərbəsi endirilib. Hadisə nəticəsində 7-si xəstəxana işçisi olmaqla ümumilikdə 9 nəfər yaralanıb. Zərbə xəstəxana binasına və təcili yardım maşınlarına da maddi ziyan vurub.
Digər tərəfdən, Livanın Hizbullah hərəkatı İsrailin cənubdakı mövqelərinə pilotsuz uçuş aparatları ilə cavab zərbələri endirdiyini açıqlayıb.
ABŞ-nin vasitəçiliyi ilə elan olunan atəşkəsə baxmayaraq, İsrail ilə Hizbullah arasında qarşılıqlı hücumların, əsasən Livanın İsrail nəzarətində olan bölgələrində, davam etdiyi bildirilir.
Livan Səhiyyə Nazirliyinin məlumatına əsasən, bölgədə gərginliyin artdığı dövrdən bəri ölənlərin sayı 3000-ə yaxınlaşıb, minlərlə yaralı olduğu qeyd edilir.
