İsrail Müdafiə Ordusu Beyrutda keçirilən hərbi əməliyyat zamanı SEPAH-ın xüsusi təyinatlı "Qüds" qüvvələrinin yüksək rütbəli üzvünün ləğv edildiyini açıqlayıb.
"Operativ Məlumat Mərkəzi-OMM" xəbər verir ki, bu barədə ordunun rəsmi "Telegram" kanalında məlumat yayılıb.
Məlumata görə, hərbi-dəniz qüvvələrinin Beyrutdakı hücumu nəticəsində Reza Xazai zərərsizləşdirilib.
O, "Qüds" qüvvələri adından "Hizbullah"ın hərbi potensialının gücləndirilməsinə cavabdeh olub və eyni zamanda Livan korpusunun qərargah rəisi vəzifəsini icra edib.
İsrail tərəfi bildirir ki, Xazai "Hizbullah" ilə İran arasında əsas əlaqələndirici şəxs olub. O, şiə hərəkatının ehtiyacları ilə İrandan gələn resursların koordinasiyasını təmin edib.
Bildirilib ki, Xazai hərbi təchizat və logistika məsələlərinə rəhbərlik edirdi. O, İranın hərbi dəstəyinin birbaşa qruplaşmaya çatdırılmasını təşkil edirdi. İsrail ordusu şimal bölgəsinin təhlükəsizliyini təmin etmək üçün əməliyyatları davam etdirir.
