İspaniya hökuməti Şimali Afrikadakı Sebte şəhərində yerləşən miqrant uşaqların ölkənin materik hissəsinə köçürülməsi ilə bağlı yeni plan hazırlayıb.
“Operativ Məlumat Mərkəzi – OMM” xəbər verir ki, İspaniya mətbuatının Uşaq və Gənclər Nazirliyindəki mənbələrə istinadən yaydığı məlumata görə, ilkin mərhələdə Sebtədəki 500 uşağın İspaniyanın materik ərazisinə yerləşdirilməsi nəzərdə tutulur.
Uşaq və Gənclər naziri Ruben Perez də vəziyyəti yerində qiymətləndirmək üçün bazar günündən etibarən Sebtedədir.
Xatırladaq ki, iyulun 30-da Fasın Fenidek şəhəri sahillərindən İspaniyanın Şimali Afrikadakı anklavı Sebtəyə üzərək keçməyə çalışan 800-dən çox qeyri-qanuni miqrantla bağlı gərginlik yaşanıb.
Hadisədən sonra İspaniya hökuməti bölgədə təhlükəsizliyin təmin olunması üçün mövcud resursların səfərbər edildiyini açıqlayıb.
Miqrasiya təzyiqinin artması fonunda sərhəd təhlükəsizliyinin gücləndirilməsi məqsədilə bölgəyə silahlı qüvvələrin yerləşdirilməsi barədə də qərar qəbul edilib.
Rəsmi məlumatlara görə, Fasdan İspaniyaya keçməyə çalışarkən həyatını itirən miqrantların sayı 88-ə çatıb.
