Azərbaycan Karbamid zavodunun fəaliyyəti sayəsində azot gübrələri ilə bağlı tələbatını tam ödəməklə yanaşı, bir sıra xarici ölkələrə də ixrac həyata keçirir. Bu barədə Prezident İlham Əliyev kənd təsərrüfatı məsələlərinə həsr olunan müşavirədə məlumat verib.
Dövlət başçısı qeyd edib ki, hazırda ölkə üçün müxtəlif növ gübrələrə ehtiyac var. Bu istiqamətdə xarici şirkətlərlə danışıqların aparıldığını bildirən Prezident, Azərbaycanda qarışıq gübrə istehsalının təşkili və idxal prosesinin fasiləsizliyinin təmin edilməsinin vacibliyini vurğulayıb:
"Çünki bu məsələlərdə də dünyada indi vəziyyət qeyri-müəyyəndir".
Prezident İlham Əliyev qaz qiymətlərindəki kəskin artımın qlobal miqyasda gübrə istehsalına mənfi təsir göstərdiyini, bəzi zavodların bağlanması səbəbindən qıtlıq yarandığını diqqətə çatdırıb. Ölkə başçısı praqmatik yanaşmanın zəruriliyini vurğulayaraq əlavə edib:
- Bütün növ gübrələrin yerli istehsalı iqtisadi baxımdan mümkün olmaya bilər.
- Buna baxmayaraq, istehsal olunan gübrə çeşidlərinin genişləndirilməsi prioritet məsələdir.
