Azərbaycanın xarici işlər naziri Ceyhun Bayramov ölkəmizdə səfərdə olan ABŞ Dövlət katibinin iqtisadi, enerji və biznes məsələləri üzrə köməkçisi Kaleb Orrun rəhbərlik etdiyi nümayəndə heyəti ilə bir araya gəlib. Xarici İşlər Nazirliyindən verilən məlumata görə, görüşdə ikitərəfli münasibətlərin cari vəziyyəti və inkişaf perspektivləri, həmçinin iqtisadiyyat, enerji təhlükəsizliyi, nəqliyyat-kommunikasiya xətləri, investisiya və ticarət sahələrində əməkdaşlıq məsələləri müzakirə olunub.
Tərəflər Azərbaycan ilə ABŞ arasında imzalanmış Strateji Tərəfdaşlıq Xartiyasına əsasən əlaqələrin genişləndirilməsinin vacibliyini vurğulayıblar. Bu xüsusda, ilk iclası keçiriləcək Azərbaycan-ABŞ İqtisadi Dialoqunun əməkdaşlığın dərinləşdirilməsindəki rolu qeyd edilib.
Görüşdə enerji sahəsindəki uzunmüddətli tərəfdaşlıq, bərpa olunan enerji, yaşıl keçid, innovasiya və yüksək texnologiyalar üzrə potensial imkanlar nəzərdən keçirilib. Nazir Ceyhun Bayramov Azərbaycanın əlverişli investisiya mühiti, regional nəqliyyat dəhlizləri və Orta Dəhlizin regional iqtisadi inteqrasiyadakı əhəmiyyəti barədə məlumat verib.
Söhbət zamanı həmçinin aşağıdakı məsələlərə toxunulub:
- Ötən ilin avqustunda Vaşinqton sammitində əldə olunan razılaşmalardan sonra regiondakı vəziyyət;
- Kommunikasiya xətlərinin açılması;
- TRIPP layihəsinin icrası ilə bağlı məsələlər.
Tərəflər qarşılıqlı maraq doğuran digər regional gündəlik mövzuları ətrafında da fikir mübadiləsi aparıblar.
