Davosda keçiriləcək Dünya İqtisadi Forumunun illik iclasının iştirakçıları ABŞ Prezidenti Donald Trampın yürütdüyü xarici siyasət kursundan dərin narahatlıq keçirirlər.
"Operativ Məlumat Mərkəzi-OMM" “Financial Times” (FT) qəzetinə istinadən xəbər verir ki, rəsmi Vaşinqtonun beynəlxalq arenadakı son addımları diplomatik dairələrdə gərginliyi artırıb.
Nəşr qeyd edir ki, ABŞ Yaxın Şərq və Latın Amerikasında "sərt müdaxilə" siyasətinə qayıdıb, lakin bu dəfə proseslər Tramp administrasiyasına xas olan fərqli üslubla müşayiət olunur.
Xüsusilə Venesuela və İrana qarşı nümayiş etdirilən döyüşkən mövqe forum iştirakçılarının əsas müzakirə mövzularından biridir.
Məqalədə vurğulanıb ki, Trampın seçki kampaniyası zamanı vəd etdiyi "sülhməramlı" mövqe artıq öz yerini aktiv müdaxiləçiliyə verib. Avropa liderləri ABŞ-nin NATO-nun əsas sütunu olmasına baxmayaraq, Vaşinqtonla münasibətlərin kəskinləşməsindən ehtiyat edirlər. Qrenlandiya məsələsi ətrafında yaranan vəziyyət və Danimarkaya qarşı mümkün sanksiya təhdidləri alyans üçün fəlakətli nəticələrə yol aça bilər.
Analitiklər hesab edirlər ki, Ağ Evin Aİ-yə qarşı nümayiş etdirdiyi soyuq münasibət və Trampın NATO-dan çıxmaq barədə əvvəlki düşüncələri müttəfiqlər arasında inamsızlığı dərinləşdirir.
