Ermənistanda Qərbi Nil qızdırması virusuna 75 yoluxma halı qeydə alınıb.

"Operativ Məlumat Mərkəzi-OMM" “Sputnik-Armeniya”ya istinadən xəbər verir ki, bu barədə Xəstəliklərə Nəzarət və Profilaktika Milli Mərkəzinin mətbuat xidməti məlumat yayıb.

Daha əvvəl bu virusa 58 yoluxma halı qeydə alınmışdı.

Qeyd edək ki, virusun nə peyvənd, nə də dərmanla müalicəsi var.

Pakistanla sərhəddə yerləşən Mircava şəhəri yaxınlığında, Sistan və Bəlucistan əyalətində silahlı hücum nəticəsində 3 iranlı sərhədçi həlak olub.

"Operativ Məlumat Mərkəzi-OMM" xəbər verir ki, bu barədə Zahidan şəhərinin prokuroru Mehdi Şəmsabadi məlumat verib.

“Bu gün axşam saatlarında Mircavada yanacaqdoldurma məntəqəsində bir neçə naməlum silahlı şəxs yanacaq dolduran sərhədçilərin avtomobilinə atəş açıb”.

Şəmsabadinin sözlərinə görə, prokurorun terror aktı adlandırdığı hücumda iki əsgər və bir leytenant rütbəli zabit həlak olub.

Bundan əlavə, yanacaqdoldurma məntəqəsində olan mülki şəxs də yaralanıb.

Avropa İttifaqı Rusiyaya qarşı fərdi sanksiyaların müddətini daha 6 ay uzadaraq iki nəfəri qara siyahıdan çıxarıb.

"Operativ Məlumat Mərkəzi-OMM" xəbər verir ki, bu barədə Aİ Şurasının bəyanatında deyilir.

“Bu gün Şura Ukraynanın ərazi bütövlüyünü, suverenliyini və müstəqilliyini pozan və ya təhdid edən şəxslərə qarşı məhdudlaşdırıcı tədbirlərin müddətini 2025-ci il martın 15-dək uzadıb”.

Şura həmçinin iki şəxsə qarşı sanksiyaların uzadılmaması və ölən beş şəxsin siyahıdan çıxarılması barədə qərar qəbul edib.

Rusiya prezidenti Vladimir Putin İran prezidentinin Moskvaya səfərini gözləyir.

"Operativ Məlumat Mərkəzi-OMM" xəbər verir ki, Rusiya lideri bu barədə İranın Milli Təhlükəsizlik Şurasının katibi Əli Əhmədianla görüşündə bildirib.

Putin deyib ki, iki ölkə arasında yeni sazişlər imzalana bilər.

“Biz yüksək qiymətləndiririk ki, Rusiya ilə əməkdaşlıq yeni prezident cənab Məsud Pezeşkianın komandası üçün prioritet olaraq qalır, biz onu oktyabrın 22-24-də Kazanda BRICS Şurasında gözləyirik”, - deyə Putin bildirib.

Türkiyə ilə Özbəkistan arasında əməkdaşlıqla bağlı yol xəritəsi imzalanıb.

"Operativ Məlumat Mərkəzi-OMM" xəbər verir ki, bu barədə Türkiyənin Xarici İşlər Nazirliyindən bildirilib.

Qeyd olunub ki, xarici işlər naziri Hakan Fidan, daxili işlər naziri Ali Yerlikaya və Milli Kəşfiyyat İdarəsinin (MİT) rəhbəri İbrahim Kalın sözügedən sənədi Daşkənddə həmkarları ilə üçtərəfli görüş çərçivəsində imzalayıblar.

Artıq 34 ölkə BRİKS-ə qoşulmaq arzusunu bildirib.

"Operativ Məlumat Mərkəzi-OMM" xəbər verir ki, bu barədə Rusiya prezidenti Vladimir Putin Sankt-Peterburqda təşkilata üzv ölkələrin təhlükəsizlik məsələlərinə cavabdeh olan yüksək səviyyəli nümayəndələri ilə görüşündə bildirib.

Onun sözlərinə görə, təşkilat üzvləri bir çox dövlətlər tərəfindən BRİKS-ə artan marağı gözardı edə bilməzdilər.

Rusiya lideri əlavə edib ki, BRİKS-in hazırkı sədri kimi Rusiya bu il assosiasiya çərçivəsində birgə fəaliyyətin təşkilinə böyük məsuliyyətlə yanaşıb.