Türkiyə Prezidenti Rəcəb Tayyib Ərdoğan Misirin dövlət başçısı Əbdülfəttah Sisini ölkəsinə dəvət edib.
"Operativ Məlumat Mərkəzi-OMM" xəbər verir ki, bu barədə Hindistanda keçirilən G20 sammitindən qayıdan R.T.Ərdoğan təyyarədə jurnalistlərin suallarını cavablandırarkən deyib.
O bildirib ki, Hindistanda Sisi ilə görüş kifayət qədər səmərəli keçib: “Xarici işlər nazirlərimiz, kəşfiyyat idarələrinin rəhbərləri müzakirələr aparacaqlar. Həmkarım məni Misirə dəvət etdi. Mən də dedim ki, sizi Türkiyədə gözləyirik. Amma hələ dəqiq tarix yoxdur. Söhbət zamanı misirli həmkarıma dedim ki, səfirin etimadnaməsini yaxın vaxtda qəbul edəcəm”.
Ərdoğan söyləyib ki, 2 dövlət arasında əlaqələr lazımi səviyyəyə qaldırılacaq: “Hər iki ölkə iqtisadiyyat və ticarət sahəsində böyük imkanlara malikdir. Ticarət həcmimizi 2 qat artırmaq üçün çalışırıq. Əlaqələrimizin əvvəlkindən daha yaxşı olması regionun da xeyrinədir”.
